Ózbekstan Respublikası Ministrler Kabinetiniń 2020-jıl 14-dekabrdegi “2020-2025 jıllarda kitapqumarlıq mádeniyatın rawajlandırıw hám qollap-quwatlaw milliy baǵdarlamasın tastıyıqlaw haqqında”ǵı 781-sanlı qararına tiykar usı jıl 18-22-aprel kúnleri elimizde “Kitapqumarlıq hápteligi” etip belgilendi.

Qarardıń orınlanıwı maqsetinde usı jıldıń 18-aprel kúni Ózbekstan mámleketlik kórkem óner hám mádeniyat institutı Nókis filialında “Kitapqumarlıq hápteligi” sheńberinde “Kitap – millettiń mádeniy hám ruwxıy miyrası” atamasında ádebiy keshe shólkemlestirildi.

Ilajdı filial direktorınıń Jaslar máseleleri hám ruwxıy-aǵartıwshılıq isleri boyınsha orınbasarı A.Ótepbergenov alıp bardı. Ádebiy keshede Qaraqlpaqstan jazıwshılar awqamı baslıǵı Keńesbay Karimov, Qaraqalpaqstan xalıq jazıwshısı, Berdaq atındaǵı Qaraqalpaq mámleketlik sıyıqtıń laureatı Muratbay Nızanov, Ózbekstan jurnalistler awqamı Qaraqalpaqstan bóliminiń baslıǵı, Ózbekstanǵa xizmet kórsetken jurnalist Keńesbay Reymov hám Qaraqalpaq xalıq jazıwshısı Allanazar Ábdievlar sózge shıǵıp, óz miynet jolı, dóretiwshilik jumısları haqqında, sonday-aq, jaslardıń búgingi kúnde bos waqıtların mazmunlı ótkeriw, kitapqa bolǵan qızıǵıwshılıǵın elede asırıw, elimizde jaslarǵa jaratılǵan sharayatlardan únemli paydalanıw kerekligi haqqında jıynalǵanlarǵa atap ótti.

Sonday-aq, ilaj dawamında miymanlar tárepinen filial kitapxanasına kitaplar sawǵa etildi.

Ilaj sońında student jaslar ózleriniń qızıqtırǵan sorawlarına juwaplar aldı.

ÓzMKÓMI Nókis filialı baspasóz xizmetı