Búgin Berdaq atındaǵı Qaraqalpaq mámleketlik akademiyalıq muzıkalı teatrında kóp jıllar dawamında kórkem óner hám mádeniyat tarawında xızmet etip, búgingi kúnde jaslarǵa bilim berip kiyatırǵan ádiwli ustaz, Qaraqalpaqstan xalıq artisti, «Doslıq ordeni» iyesi, professor S.Baltaniyazovtıń 70 jıllıǵına baǵıshlanǵan yubiley keshesi bolıp ótti.

Oǵan jámiyetlik shólkem wákilleri, kórkem óner hám mádeniyat tarawınıń xızmetkerleri, professor-oqıtıwshılar hám student-jaslar qatnastı.

Ilajda Qaraqalpaqstan Respublikası Joqarǵı Keńesiniń komitet baslıǵı M.Atamuratov, Ózbekstan Veteranlarınıń sociallıq jumısların qollap-quwatlaw “Nuranıy” qorı Qaraqalpaqstan Respublikası bólimi baslıǵı T.Abdijabbarov, filial direktorı K.Yusupov hám basqalar shıǵıp sóylep, S.Baltaniyazovtıń qaraqalpaq kórkem óneri hám mádeniyatı, sonday-aq, ilim-bilimlendiriw tarawına qosıp atırǵan dóretiwshilik miynetlerin ayrıqsha atap ótti.

Ilajda atap ótilgenindey, S.Baltaniyazov kórkem ónerimiz hám mádeniyatımızdıń jankúyeri, jaslardıń ádiwli ustazı esaplanadı. Onıń repertuarınan orın alǵan Ana-Watan, tuwılǵan jer, muxabbat hám doslıqtı jırlawshı xalıq qosıqları ıqlasbentler arasında keńnen taralǵan. Ol sońǵı jıllarda tarawda toplaǵan mol tájiriybesi nátiyjesinde Ózbekstan mámleketlik kórkem óner hám mádeniyat institutı Nókis filialında kóp sanlı shákirtlerdi tayarlap kelmekte. Búgingi kúnde ilim jolında da bir katar ilimiy miynetler dóretip, bes oqıw qollanba hám 30 dan aslam ilimiy maqalaları baspadan shıqtı.

Yubiley keshesi kórkem óner sheberleri hám filial student-jasları tárepinen tayarlanǵan koncert baǵdarlaması menen dawam etti.

Filial baspasóz xızmeti.