Búgin Ózbekstan mámleketlik kórkem óner hám mádeniyat institutı Nókis filialında Ózbekstan xalıq artisti, Berdaq atındaǵı sıylıqtıń laureatı, «Mexnat shuhratı», «El-yurt hurati», «Doslıq» ordenleri iyesi, «Ózbekstan Respublikasına xızmet kórsetken jaslar ustazı», professor Najimatdin Ańsatbaevtıń 80 jıllıq yubileyine baǵıshlanǵan Respublikalıq ilimiy-teoriyalıq konferenciya bolıp ótti.

Dáslep, Najimatdin Ańsatbaevtıń ómiri hám dóretiwshiligi boyınsha tayarlanǵan hújjetli fil’m jıynalǵanlar názerine usınıldı.

Konferenciyanı filial direktorı, filologiya ilimleriniń kandidatı A.Ayapov kiris sóz benen ashtı hám Najimatdin Ańsatbaevtıń ayrıqsha talantı, bay dún’yaqarası, xalqımızdıń milliy mádeniyatı hám teatr kórkem óneriniń rawajlanıwı jolındaǵı pidayı miynetlerin ayrıqsha atap ótti. 

Bunnan soń, Berdaq atındaǵı Qaraqalpaq mámleketlik universiteti professorı Baxtiyar Abdikamalov, Ájiniyaz atındaǵı Nokis mámleketlik pedagogikalıq institutı professorı P.Shılmanov, usı instituttıń Muzıkalıq tálim kafedrası baslıǵı A.Allanov, Kórkem ónertanıw» kafedrası baslıǵı, docent Jabbarbergen Xojanov, Teatr kórkem óneri fakul’teti dekanı, t.i.k., professor. Gulchira Xodjametova, Xalıq dóretiwshiligi fakul’teti dekanı, docent Q.Turdiev, “Texnogen kórkem ónertanıw” fakul’teti dekanı, docent K.Zaretdinov hám basqalar shıǵıp sóylep, N.Ańsatbaevtıń ómiri hám teatr kórkem ónerindegi dóretiwshilik jumısları haqqında maǵlıwmat berip ótti.

Ilajda atap ótilgenindey, N.Ańsatbaev qaraqalpaq, ózbek hám basqa da tuwısqan xalıqlar dramaturgleriniń 60 tan aslam shıǵarmaların saxnalastırıp, kóplgen shıǵarmalarda qaharman obrazların dóretti.

Atap aytqanda, «Eki  bayǵa  bir  malay» spektaklinde  Florindo, «Qáyin ene» spektaklinde Ayaz, «Aktrisanıń  ıǵbalı» spektaklinde  Ábdiraman Ótepov, «Nawayı Astarabad» spektaklinde Alisher Nawayı, «Berdaq» spektaklinde Berdaq, V.Shekspirdiń «Otello» spektaklinde Kassio, T.Jumamuratovtıń «Tiklengen tuw» spektaklinde Bayxan, A.Begimov hám T.Allanazarovtıń «Ǵárip ashıq» spektaklinde Ǵárip, T.Seytjanovtıń «Ábu  Rayxan  Beruniy» spektaklinde Mamun  shax, S.Xojaniyazovtıń «Mamanbiy» spektaklinde Maman, A.Abdulinniń «On úshinshi predsedatel’» spektaklinde Sagadeev, B.Jakievtiń «Áke táǵdiri» spektakllerinde Aqılbek sıyaqlı baslı rollerdi sheberlik  penen  atqarıp  xalqımızdıń alǵısına miyasar boldı.

Sonday-aq, Rejissyor sıpatında K.Raxmanovtıń  «O  dún’yaǵa  mirát», «Jaralı  júrekler»,  «Urını qaraqshı bastı» M.Karimniń «Ay tutılǵan túnde», S.Xojaniyazovtıń «Súymegenge  súykenbe»,  T.Jumamuratovtıń «Tiklengen  tuw»,  T.Seytjanovtıń  «Abu  Rayxan Beruniy»,   Q.Abdireymov penen birge O.Abdiraxmanovtıń «Tirsekler», A.Abdulinniń «On úshinshi    predsedatel’», A.Qahhardıń «Saq ǵarǵa saǵaǵınan», B.Jakievtıń «Áke  táǵdiri», S.Axmadtıń «Kelinler qozǵalańı», U.Umarbekovtıń «Óz arzası  menen»,  Cagarelidiń «Xanuma», S.Balǵabaevtıń «Eń sulıw kelinshek», K.Narqabıldıń «Nur sayada qalmaydı» spektakllerin saxnalastırdı. N.Ańsatbaevtı kórkem ónerimiz hám mádeniyatımızdıń jankúyeri, belgili aktyor, rejissyor, sonday-aq, jaslardıń ádiwli ustazı sıpatında xalqımız keńnen tanıydı. Onıń tarawda atqarǵan pidayı miynetleri Húkimetimiz tárepinen múnásip bahalanıp, Ózbekstan xalıq artisti, Berdaq atındaǵı sıylıqtıń laureatı, «Mexnat shuhratı», «El-yurt hurati», «Doslıq» ordenleri iyesi, «Ózbekstan Respublikasına xızmet kórsetken jaslar ustazı» ataqları menen sıylıqlandı.

Ilajdıń ekinshi bóliminde N.Ańsatbaev atkarǵan roller hám saxnalastırǵan shıǵarmalar student-jaslar tárepinen atqarılıp, koncert baǵdarlaması menen dawam etti.

Filial baspasóz xızmeti.