Shıǵıs xalqınıń oyanıw pasılı bolǵan «jańa kún», «jańa jıl» Nawrız bayramı bıyılda úlkemizge qutlı qádem qoymaqta. Jańalanıw hám jasarıw áyyamı bolǵan Nawrızdı xalqımız kún menen túnniń teńlesiwi, tábiyattıń oyanıwı sıpatında bul bayramdı keń túrde belgilep kelmekte.
Úsh mıń jıldan zıyat tariyxqa ie bolǵan Nawrız – ózinde barlıq milliy úrp-ádet dástúrlerimiz benen qádiriyatlarımızdı jámlegeni menen xalqımız ushın oǵada qádirli esaplanadı. Bıyılǵı Nawrız bayramı elimizde “Nawrızdı ulıǵlaw insandı ulıǵlaw” súreni astında ulıwmaxalıqlıq seyil tárizinde kóterińkilik jaǵdayında belgilenbekte.
Búgin Ózbekstan mámleketlik kórkem óner hám mádeniyat institutı Nókis filialında teatrlastırılǵan bayram keshesi bolıp ótti. Bayram ilajında filial direktorı Q.Yusupov shıǵıp sóylep, jıynalǵanlardı báhár ayyyamı – Nawrız bayramı menen qızǵın qutlıqladı.
Álbette, usınday ashıq aspan, tınıshlıq húkimranlıq súrip turǵan ana diyarımızǵa bayramlar jarasadı. Sońǵı jılları elimizde húrmetli Prezidentimizdiń basshılǵında sociallıq-ekanomikalıq turmısımızdıń barlıq tarawlarında túpkilikli reformalar ámelge asırılıp, sonıń ishinde bilimlendiriw tarawına da jaslarımızdıń oqıp bilim alıwı ushın barlıq múmkinshilikler jaratıp berilmekte. Bul baǵdardaǵı jumıslardıń ámeliy kórinisi sıpatında 2025-2026-oqıw jılında jaslarımız ushın qosımsha kvotalardıń ajıratılıwı, sonday-aq, magistratura basqıshında oqıp atırǵan hayal-qızlarımızdıń shártnama tólemleri mámleketimiz tárepinen tólep berilmekte.
Sonı ayrıqsha atap ótiwmiz tiyis, hár jılı bayram múnásibeti menen Tashkent hám Nókis qalalarında ótkeriletuǵın saltanatlı bayram ilajlarında filialımızdıń dóretiwshi jasları da xalqımızdıń belgili kórkem óner iyeleriniń qatarında óz koncert baǵdarlamaları belsene qatnasıp, ózleriniń dóretiwshilik qábiletlerin kórsetip kelmekte. Álbette, usınday bilimli, qábiletli jaslardıń jetilisip shıǵıwı olarǵa bilim bergen uzstazlardıń, qalaberse jámáátimiz ushın úlken maqtanısh esaplanadı.
Bayram ilajında hár qıylı milliy taǵamlarımızdı, ata-babalarımızdan qalǵan úy buyımların ákelip kórgizbede usındı. Bayram tamashaları dawamında milliy sport oyınları bolǵan arqan tartısıw, tas kóteriw hám qol gúresi sıyaqlı oyınlar ótkerilip, jeńimpazlar sıylıqlandı.
Bayram keshesinde «Tumar» ansambli hám student-jaslar tárepinen tayarlanǵan koncert baǵdarlaması jıynalǵanlar názerine usınıldı. Ashıq aspan astında ótkerilgen teatrlastırılǵan koncert baǵdarlaması bársheniń kewiline yosh hám joqarı keypiyat inam etti.
Bayram ilajına Qaraqalpaqstan Respublikası Mádeniyat ministirinıń birinshi orınbasarı B.Allaxov hám Qaraqalpaqstan Respublikası Kásiplik bilimlendiriw agentligi direktorı A.Ayapovlar qatnastı.
