«Ózbekstan Respublikasınıń mámleketlik gimni haqqında»ǵı Nızam 1992-jıl 10-dekabrde Ózbekstan Respublikası Oliy Kengashining on birinshi sessiyasında qabıl etildi. Bıyıl Ózbekstan Respublikası mámleketlik gimniniń qabıl etilgenine 31 jıl toldı. Bayram ilajları elimizdiń barlıq orınlarında kóterińki ruwxta belgilenbekte.

Sáne múnásibeti menen Ózbekstan mámleketlik kórkem óner hám mádeniyat institutı Nókis filialında bayram ilajı bolıp ótti.

Dáslep, Ózbekstan hám Qaraqalpaqstan Respublikalarınıń mámleketlik gimnleri jańladı.

Bunnan soń filial direktorı A.Ayapov, Hayal-qızlar keńesi baslıǵı O.Kdırniyazova hám «Vokal» kafedrası professorı S.Baltaniyazovlar shıǵıp, sóylep, mámleketimiz nıshanları, sonıń ishinde, gimnniń áhmiyetine ayrıqsha toqtap ótti.

Hár bir mámlekettiń bayraǵı, gerbi, gimni — sol mámleket suverinitetiniń tımsalı bolıp esaplanadı. Usı mámleketlik nıshanlar arqalı biz ózligimizdi maqtanısh etemiz, erteńgi kúnge bolǵan isenimimizdi bekkemleymiz. Xalqımız ótmishin, milliy-mádeniy dástúrlerin, qádiriyatların, tınıshlıq hám milletleraralıq tatıwlıq sıyaqlı pazıyletlerdi ózinde jámlegen gimn ózligimizdi maqtanısh etiwde, jaslardı Oatansúyiwshilik ruwxında tárbiyalawda, sonday-aq, olardıń hár tárepleme jetik insanlar bolıp jetilisiwinde tárbiyalıq áhmiyetke iye qural sıpatında xızmet etip kelmekte. Sonday-aq, mámleketlik gimn elimiz delegaciyalarınıń sırt ellerge saparı waqtında, xalıqaralıq maydanlardaǵı túrli ilajlarda, sport jarıslarında elimizdiń tımsalı sıpatında jańlap kelmekte.

Maǵlıwmat ornında aytıp ótetuǵın bolsaq, mámleketlik gimnniń sózi Ózbekstan xalıq shayırı A.Aripov qálemine tiyisli bolıp, naması Mutal Burxanov tárepinen jazılǵan.

Filial baspasóz xızmeti.