Ózbekstan mámleketlik kórkem óner hám mádeniyat institutı Nókis filialında «Keleshekke qádem» orayınıń aymaqlıq bólimi menen birgelikte óz biznes ideyaların ámelge asırıw tileginde bolǵan pitkeriwshi basqısh studentleri ushın isbilermenlik joybarların ámelge asırıw boyınsha seminar-trening shólkemlestirildi.

Seminar-treningke «Ózmilliybank» AJ Qaraqalpaqstan Respublikası Bas basqarmasınan juwapker qánigeler hám isbilermenler, sonday-aq, filial bólim baslıqları, dekan orınbasarları, mendejerler hám pitkeriwshi student-jaslar qatnastı.

Ilajdı Filial Registrator ofisi baslıǵı M.Saǵındıkov ashıp berdi. Bunnan soń, «Ózmilliybank» AJ Qaraqalpaqstan filialı «Keleshekke qádem» oraylıq sekrotı menedjeri K.Sharipova hám isbilermen A.Qaypanovlar sózge shıǵıp, mámleketimizde óz biznesin jolǵa qoymaqshı bolǵan student-jaslarǵa «Keleshekke qádem» baǵdarlaması sheńberinde jaratılǵan imkaniyatlardıń nátiyjeleri haqqında maǵlıwmat berip ótti. Sonday-aq, baǵdarlamaǵa tiykar pitkeriwshi studentlerge «Ózmilliybank» AJ tárepinen islep shıǵılǵan finanslıq xızmetler hám kredit shártleri haqqında túsinik berip ótildi. Bunda jaslarǵa házirgi waqıtta mámleketimiz tárepinen bir qatar kreditler ajratılǵanın aytıp ótip, biznes joybarı bar bolǵan studentlerdi hár tárepleme qollap-quwatlanatuǵınlıǵı atap ótildi.

Ilajda atap otilgenindey, tiykarınan pitkeriwshi jaslarǵa óz isbilermenligin baslaw ushın «Isbilermenlikke birinshi qádem» atlı joybar ushın 20 mln alıw imkaniyatı jaratılǵan bolıp, bunda kredit múddeti 18 ayǵa shekem. Al, imtiyazlı dáwir bolsa 6 ayǵa shekem etip belgilengen. 

«Biznes start» atlı joybar ushın bolsa 300 mln alıw imkaniyatı jaratılǵan bolıp, bunda kredit múddeti 5 jılǵa shekem. Al, imtiyazlı dáwir bolsa 1 jılǵa shekem etip belgilengen.  

«Biznes progress» atlı joybarda bolsa 20 mlrd alıw imkaniyatı jaratılǵan bolıp, bunda kredit múddeti 7 jılǵa shekem. Al, imtiyazlı dáwir bolsa 2 jılǵa shekem etip belgilengen.  

«Talaba invest» atlı joybarda 10 mlrd alıw imkaniyatı jaratılǵan bolıp, bunda kredit múddeti 7 jılǵa shekem. Al, imtiyazlı dáwir bolsa 2 jılǵa shekem etip belgilengen.  

«Meniń birinshi kásibim» atlı joybarda bolsa pitkeriwshiler arasında tańlaw ótkerilip, olarǵa tájiriybe arttırıw dáwiri ushın 5 aylıq bazalıq esaplaw muǵdarında stipendiya ajıratıladı. Sonday-aq, pirkeriwshiler shet eldegi joqarı oqıw orınları hám kárxanalarda qısqa múddetli kurslarda qatnasıwı ushın 50 bazalıq esaplaw muǵdarında ǵárejet ajıratıladı.

Álbette, bul imkaniyatlar jaslardıń óz bizneslerin jolǵa qoyıwında áhmiyetli baǵdarı sıpatında xızmet etedi dep oylaymız.

Filial baspasóz xızmeti.