Házirgi waqıtta filialımızdıń “Rejissura kórkem óneri” kafedrası baslıǵı, docent Liza Urazmbetova hám usı kafedranıń oqıtıwshısı Maryash Tajigalievalar Qazaqstan Respublikasınıń Shımkent qalasında jaylasqan M.Awezov atındaǵı Qubla-Qazaqstan universitetiniń “Oner” kafedrasında xızmet saparı menen bolıp tur.

Bul xızmet saparı dawamında professor-oqıtıwshılarımız  M.Awezov atındaǵı Qubla-Qazaqstan universitetiniń “Rejissura” tálim baǵdarı studentlerine “Stanislavskiy sisteması – aktyor hám rejissyordı tayarlaw sisteması”, “Estrada qosıqshısın tárbiyalaw usılları” hám “Quwırshaq basqarıw usılları” temalarında sheberlik sabaqların ótiw menen bir qatarda, sol jerdegi kásiplesleri menen ilimiy hám metodikalıq tájiriybe almasıw jumısların alıp barmaqta. Sonday-aq, eki universitet ortasında studentlerdi akademiyalıq almasıw kelisimine muwapıq, filialdıń 2-kurs studentleri  Shaxsánem Urazmbetova hám Gúlbanu Dúysenbaevalar Qubla-Qazaqstan universitetindegi óz qánigelikleri boyınsha sabaqlarǵa qatnasıp atır.

2019-jıldan baslap óz-ara jaqın birge islesip kiyatırǵan M.Awezov atındaǵı Qubla-Qazaqstan universiteti ataqlı xalıqaralıq reyting shólkemi “QS-Quacquarelli Symonds” tárepinen 2023-jılda “Dúnyanıń eń jaqsı universitetleri TOP-1000”lıq reytinginde 443-orındı iyelegen Qazaqstan Respublikasınıń belgili universitetlerinen biri esaplanadı.