Hár bir mámlekettiń bayraǵı, geribi, gimini-sol mámleket suverinitetiniń tımsalı esaplanadı. Usı mámleketlik nıshanlar arqalı biz ózligimizdi maqtanısh etemiz, ertengi kúnge bolǵan isenimimizdi bekkemleymiz.

1992-jıl 14-dekabr kúni Qaraqalpaqstan Respublikası Joqarǵı Keńesiniń XI sessiyasında «Qaraqalpaqstan Respublikasınıń mámleketlik bayraǵı haqqında»ǵı Nızam qabıl etildi.

Bıyıl «Qaraqalpaqstan Respublikasınıń mámleketlik bayraǵı haqqında»ǵı Nızamınıń qabıl etilgenine 31 jıl toldı.

Elimiz bayraǵı jaqsılıq, danıshpanlıq, páklik, sadıqlıq, gózzallıq, tınıshlıq, jańalanıw sıyaqlı sezimlerdi ózinde jámlegeni menen áhmietli sanaladı. Solay eken, elimiz bayraǵın kóz qarashıǵınday qásterlep-saqlaw, onı ulıǵlaw hám bálentlerge kóteriw-hár birimiz ushın ana-Watan aldındaǵı perzentlik parızımız bolıp esaplanadı.

Bayraqtaǵı jańa tuwılǵan ay musılmanlardıń muqqaddes tımsalı bolsa, bes juldızdıń súwreti Qaraqalpaqstannıń áyyemgi hám nawqıran bes qalasınıń-qaraqalpaqstanlılardıń turmıs hám isenim qorǵanlarınıń tımsalı bolıp tabıladı.

Sáne múnásibeti menen Ózbekstan mámleketlik kórkem óner hám mádeniyat institutı Nókis filialında bayram ilajı bolıp ótti.

Dáslep, Ózbekstan hám Qaraqalpaqstan Respublikalarınıń mámleketlik gimnleri jańladı.

Bunnan soń filial direktorı A.Ayapov, «Xalıq dóretiwshiligi» fakulteti dekanı Q.Turdiev, hám filial professorı M.Ismailovalar shıǵıp, sóylep, mámleketimiz nıshanları, sonıń ishinde, bayraqtıń áhmiyetine ayrıqsha toqtap ótti.