Қарақалпақстан Республикасы Мәмлекетлик гимни 1993-жыл 24-декабрь күни Қарақалпақстан Республикасы Жоқарғы Кеңесиниң XIV сессиясында «Қарақалпақстан Республикасының Мәмлекетлик гимни ҳаққында»ғы Нызам қабыл етилди. Быйыл Қарақалпақстан Республикасы мәмлекетлик гимниниң қабыл етилгенине 29 жыл толды. Байрам илажлары республикамыздың барлық орынларында көтериңки руўхта белгиленбекте.

Сәне мүнәсибети менен Өзбекстан мәмлекетлик көркем өнер ҳәм мәденият институты Нөкис филиалында байрам илажы болып өтти.

Дәслеп, Өзбекстан ҳәм Қарақалпақстан Республикаларының мәмлекетлик гимнлери жаңлады.

Буннан соң филиал директоры А.Аяпов, Ҳаял-қызлар мәселелери бойынша директор мәсләҳәтшиси О.Қдырниязова ҳәм «Режиссура ҳәм актёр шеберлиги» кафедрасы оқытыўшысы, Қарақалпақстан Республикасына хызмет көрсеткен артист Б.Назарымбетовлар шығып, сөйлеп, мәмлекетимиз нышанлары, соның ишинде, гимнниң әҳмийетине айрықша тоқтап өтти.

Илажда атап өтилгениндей, ҳәр бир мәмлекеттиң байрағы, герби, гимни — сол мәмлекет суверинитетиниң тымсалы болып есапланады. Усы мәмлекетлик нышанлар арқалы биз өзлигимизди мақтаныш етемиз, ертеңги күнге болған исенимимизди беккемлеймиз. Халқымыз өтмишин, миллий-мәдений дәстүрлерин, қәдириятларын, тынышлық ҳәм миллетлераралық татыўлық сыяқлы пазыйлетлерди өзинде жәмлеген гимн өзлигимизди мақтаныш етиўде, жасларды Ўатансүйиўшилик руўхында тәрбиялаўда, сондай-ақ, олардың ҳәр тәреплеме жетик инсанлар болып жетилисиўинде тәрбиялық әҳмийетке ийе қурал сыпатында хызмет етип келмекте. 

Илаж Қарақалпақстан Республикасы Мәмлекетлик гимниниң мазмун-манисине багышланған ашық сабақ пенен даўам етти.

Мағлыўмат орнында айтып өтетуғын болсақ, мәмлекетлик гимнниң авторы Өзбекстан қаҳарманы Ибрайым Юсуповқа тийисли болып, музыкасын белгили композитор Нәжиматдин Муҳаммеддинов тәрепинен жазылған.

Филиал баспасөз хызмети.