Búgin Ózbekstan mámleketlik kórkem óner hám mádeniyat institutı rektorı, professor Nodirbek Sayfullaev basshılıǵındaǵı professor-oqıtıwshılar delegaciyası instituttıń Nókis filialına xızmet saparı menen keldi.
Miymanlardı Qaraqalpaqstan Respublikası Joqarı bilimlendiriw, ilim hám innovaciyalar ministri A.Ayapov, filial direktorı wazıypasın atqarıwshı K.Yusupov hám jámááti aǵzaları joqarı dárejede kútip aldı.

Ilajda filialdıń oqıw procesiniń sapası, ruwxıy-aǵartıwshılıq jumıslardıń sociallıq belsendiligin arttırıw hám ilimiy potencialdı bunnan bılay da jetilistiriw kerekligi atap ótildi. Sonday-aq, jaslardı watansúyiwshilik, milliy hám ulıwma insanıylıq qádiriyatlarǵa sadıq ruwxında tárbiyalaw, olardıń intellektuallıq hám dóretiwshilik potencialın rawajlandırıw, olardı ilim, kórkem ónerge baǵdarlaw boyınsha hár qıylı joybarlar menen baslamalardı jolǵa qoyıw kerek ekenligi atap ótildi.

Bunnan soń N.Sayfullaev filial professor-oqıtıwshıları menen ushırasıw ótkerdi. Ilajda filialda oqıw-metodikalıq hám dual bilimlendiriw baǵdarlamasın jolǵa qoyıw, ruwxıy-aǵartıwshılıq, ilimiy-dóretiwshilik jumıslardı bunnan bılay da jedellestiriw, xalıqaralıq birge islesiw jumısları, sonday-aq, pitkeriwshilerdiń bántligin támiyinlew máseleleri boyınsha pikir-usınıslar bilidirilip, keleshekte birgelikte ámelge asırılatuǵın jumıslar belgilenip alındı.

Ushırasıw sońında Xalıq dóretiwshiligi kafedrası oqıtıwshısı Z.Yoldasheva hám Kitapxana iskerligi kafedrası oqıtıwshısı D.Aytimovalarǵa Joqarı attestaciya komissiyasınıń docent diplomlari tapsırılıp, ilimiy jumıslarında tabıslar tiledi.
Bunnan soń, Institut professor-oqıtıwshıları delegaciyası filial student-jasların metodikalıq qollap-quwatlawda sheberlik sabaqlarına jol aldı.