Usı jıldıń 18-oktyabr kúni Qaraqalpaq mámleketlik jas tamashagóyler teatrında Ózbekstan mámleketlik kórkem óner hám mádeniyat institutı Nókis filialı tárepinen “Rus klassikleri qaraqalpaq tilinde sóyleydi” xalıqaralıq joybarınıń Saltanatlı ashılıw keshesi hám joybar rejesindegi rus ataqlı dramaturg-jazıwshısı Anton Pavlovich Chexovtıń “Sudtan aldınǵı tún” shıǵarması tiykarında saxnalastırılǵan spektakliniń Premerası bolıp ótti.

 “Rus klassikleri qaraqalpaq tilinde sóyleydi” joybarı Rossiya Federaciyasınıń “Russkiy Mir” fondınıń grantı tiykarında ámelge asırılıp atırǵan bolıp, joybardıń tiykarǵı maqseti-Qaraqalpaqstan Respublikasında rus tili hám ádebiyatı, mádeniyatı hám kórkem ónerine bolǵan qızıǵıwshılıqtı arttırıw, onı úgit-násiyatlawdan ibarat.

Joybar sheńberinde Ózbekstan mámleketlik kórkem óner hám mádeniyat institutı Nókis filialınıń «Teatr kórkem óneri» fakultetiniń tájiriybeli professor-oqıtıwshıları hám talantlı student jasları ataqlı rus dramaturg-jazıwshıları Anton Pavlovich Chexovtıń «Sudtan aldınǵı tún», «Ayıw», «Usınıs» shıǵarmaların hám Nikolay Vasilevich Gogoldıń «Revizor» shıǵarmasın saxnalastırıp, respublikamız boylap gastrol saparlarına shıǵıwı rejelestirilgen. Joybardıń ulıwma qarjı muǵdarı 1 million 14 mıń 900 Rossiya rubline teń.

Ilajǵa respublikamızdaǵı joqarı oqıw orınları professor-oqıtıwshıları, student-jasları hám Ǵalaba xabar quralları wákilleri qatnastı.

Ózbekstan mámleketlik kórkem óner hám mádeniyat institutı Nókis filialı Baspasóz xızmeti