Xabarıńız bar usı jıl 24-oktyabr kúni Ózbekstan Respublikası Prezidentligine saylaw bolıp ótedi. Saylawda jaslardıń belsendiligin arttırıw hám saylaw nızamshılıǵı boyınsha bilimlerin asırıwda orınlarda ilajlar ótkerilmekte.   

Ózbekstan mámleketlik kórkem oner hám mádeniyat institutı Nókis filialında «Saylaw hám jaslar» atamasında ushırasıw bolıp ótti. Oǵan professor-oqıtıwshılar hám student-jaslar qatnastı.

Ilajdı filial direktorı A.Ayapov basqarıp bardı. Onda Ózbekstan Respublikası Oliy Majlis Nızamshılıq palatası deputatı M.Ibragimov shıǵıp sóylep, elimizde bolıp ótetuǵın Ózbekstan Respublikası Prezidenti saylawınıń áhmiyetin, sonday-aq, saylawda qatnasıwshı jaslar bul siyasiy mapazda biyparıq bolmay belsendilik penen qatnasıw kerekligin atap ótti.  

Ushırasıw dawamında Jańa Ózbekstandı hám Úshinshi Renessans tiykarın jaratıw baǵdarında ámelge asırılıp atırǵan túpkilikli reformalar, onda  belgilengen tiykarǵı baǵdarlardıń mazmun-mánisi boyınsha da túsinik berildi.

Álbette, bunday ushırasıwlardıń ótkeriliwi jaslardıń saylaw nızamshılıǵı boyınsha bilimlerin bekkemlew, sonıń menen birge, siyasiy partiyalar turmısı haqqında keńnen túsinikke iye bolıwında áhmiyetli esaplanadı.  

Ilaj sońında student-jaslar ózlerin qızıqtırǵan sorawlarına juwap aldı.

ÓzMKÓMI Nókis filialı baspasóz xızmeti.