Ózbekstan mámleketlik kórkem óner hám mádeniyat institutı Nókis filialı májlisler zalında Ullı shax hám shayır Zahiriddin Muhammed Babur tuwılǵanınıń 537 jıllıǵına baǵıshlanıp «Ajdodlar merosi – bebaho xazina» atlı teatrlastırılǵan ádebiy keshe bolıp ótti.

Ótkerilgen keshege Qaraqalpaq mámleketlik Jas tamashagóyler teatrınıń jetekshi aktyorları miymanǵa keldi.

Ádebiy keshede Zahiriddin Muhammed Baburdıń ómiri hám dóretiwshiligi haqqında maǵlıwmatlar berildi. Sonday-aq estrada qosıqlar, milliy ayaq oyınlar hám sahnalıq kórinisler menen filial student jasları kelgen miymanlardıń hám tamashagóylerdiń kewillerin tawday kóterdi. Sońınan qatnasıwshılar tamashagóyler menen soraw-juwap ótkerip, durıs juwap bergen tamashagóyge ózleri tárepinen sawǵalar tapsırdı.

Keshe sońında Jas tamashagóyler teatrınan kelgen miymanlar filialda bunday talantlı jaslar oqıp atırǵanına quwanıshlı ekenligin ayttı hám óz minnetdarshılıǵın bildirdi. Filial jámááti tárepinen miymanlarǵa «Minnetdarshılıq xatı» tapsırıldı hám qatnasqan filial student jasları «Húrmet jarlıǵı» hám bahalı sawǵalar menen sıylıqlandı.