Usı jıldıń 15-noyabr kúni Kegeyli rayonındaǵı Mádeniyat orayında Ózbekstan mámleketlik kórkem óner hám mádeniyat institutı Nókis filialı tárepinen “Rus klassikleri qaraqalpaq tilinde sóyleydi” joybarı sheńberinde A.P.Chexovtıń “Sudtan aldınǵı tún” spektakli Kegeyli, Shımbay, Bozataw rayonlarındaǵı joqarı oqıw orınlarınıń student-jasları, kásip-óner mektepleri oqıwshıları hám Kegeyli rayonı turǵınları názerine usınıldı.

 Ilajdı joybar administratorı B.Sultamuratov kiris sóz benen ashıp berdi. Ol tamashagóylerge filial tariyxı hám búgingi turmısı haqqında qısqasha sóz etip, “Rus klassikleri qaraqalpaq tilinde sóyleydi” joybarı maqseti hám wazıypaları haqqında aytıp berdi.

Bunnan soń, saxna perdeleri kóterilip, filialdıń «Teatr kórkem óneri» fakultetiniń tájiriybeli professor-oqıtıwshıları hám talantlı student-jasları tárepinen saxnalastırılǵan ataqlı rus dramaturg-jazıwshıları A.P.Chexovtıń «Sudtan aldınǵı tún» spektakli tamashagóyler názerine usınıldı. Spektakl tamashagóyler tárepinen jaqsı kútip alındı hám ilaj sońında spektaklde obrazlardı jaratıp bergen aktyorlar menen estelikke súwretke tústi.

Filial baspasóz xızmeti