Ullı sóz sheberi, shayır Alisher Nawayı hám Zahriddin Muxammad Bobur ómir jolı, bizge miyras etip qaldırǵan bay ádebiy dóretpeleriniń jaslar tárbiyasında tutqan ornı ayrıqsha esaplanadı. Sóz múlkiniń sultanı Alisher Nawayınıń tuwılǵanına 585 jıl hám Zahriddin Muxammad Boburǵa 543 jıl tolıwı múnásibeti menen Ózbekstan mámleketlik kórkem óner hám mádeniyat institutı Nókis filialında “Eki ullı tulǵa” atamasında ádebiy keshe shólkemlestirildi.

Ádebiy kesheni filial Jaslar máseleleri, ruwxıy-aǵartıwshılıq isleri boyınsha direktor orınbasarı A.Otepbergenov ashıp berdi.
Keshege Berdaq atındaǵı Qaraqalpaq mámleketlik universiteti «Ózbek filologiyasır» fakulteti “Ózbek tili hám ádebiyatı” kafedrası docenti, pedagogika pánleri boyınsha filosofiya doktorı (PhD) J.Nurjanova, «Ózbekstan xalq artisti», «Do’stlik» ordeni iyesi, «O’zbekistonda xizmat ko’rsatgan yoshlar murabbiyi» ataqları iyesi hám 25 jasında A.Nawayı rólinde oynaǵan N.Ańsatbaev, «Social gumanitar pánler» kafedrası oqıtıwshısı, filologiya ilimler doktorı, PhD A.Prekeeva, filial jámááti hám student-jaslar qatnastı.

Ilajda sózge shıqqanlar A.Nawayı ómiri hám hám Zahriddin Muxammad Bobur dóretiwshiligi haqqında sóz etti. Sonday-aq, N.Ańsatbaev saxnada Alisher Nawayı rólin atqarǵanlıǵı haqqında qızıqlı maǵlıwmatlar menen tanıstırıp ótti.

Keshe dawamında filial student-jasları tárepinen shayır qálemine tiyisli qosıq qatarları, saxnalıq kórinisler hám ǵázelleri janlı dawısta atqarıldı.