Berdaq atındaǵı Qaraqalpaq mámleketlik muzıkalı akademiyalıq teatrında Ózbekstan mámleketlik kórkem óner hám mádeniyat institutı Nókis filialı tárepinen XIX ásir qaraqalpaq klassik shayırı Ájiniyaz Qosıbay ulınıń 200 jıllıǵına arnalǵan teatrlastırılǵan koncert baǵdarlaması bolıp ótti.
Ilajǵa Ózbekstan mámleketlik kórkem óner hám mádeniyat institutı rektorı, professor N.Sayfullaev hám Qaraqalpaqstan Respublikası Mádeniyat ministri B.Temirbaev, sonday-aq, mámleketimizdegi bir qatar joqarı oqıw orınları, belgili dóretiwshiler, filialdıń professor-oqıtıwshıları hám studentleri, keń jámiyetshilik hám ǵalaba xabar qurallarınıń wákilleri qatnastı.
Ilajda Ózbekstan mámleketlik kórkem óner hám mádeniyat institutı Nókis filialı direktorı A.Ayapov shıǵıp sóylep, qaraqalpaq ádebiyatınıń klassikalıq shayırı Ájiniyaz Qosıbay ulınıń shıǵıs xalıqları mádeniyatı hám ádebiyatın, xalıqlar arasındaǵı doslıq qatnasıqlardı rawajlandırıwda, sonıń menen birge, jas áwladtı watan súyiwshilik hám xalıqshıllıq ruwxında tárbiyalawda úlken úlesi bar ekenligin atap ótti. Onıń tákirarlanbas ádebiy miyrasın xalqımız arasında ele de keńnen en jaydırıw maqsetinde ámelge asırılıp atırǵan jumıslardıń áhmiyeti haqqında maǵlıwmatlar berildi.
Atap ótiw orınlı, shayırdıń biytákirar ádebiy miyrasın jáne de keńnen úyreniw hám ǵalaba en jaydırıwda Húrmetli Prezidentimizdiń baslaması menen xalqımızdıń súyikli shayırı Ájiniyaz Qosıbay ulınıń 200 jıllıǵı YuNESKO sheńberinde xalıqaralıq kólemde belgilenetuǵın yubileyler qatarına kirgiziliwi shayırdıń dóretiwshilik miyrası ulıwma insanıylıq áhmiyetke iye ekeninen dárek beredi.
Álbette, Ájiniyaz Qosıbay ulı óziniń biytákirar hám mazmunlı dóretiwshiligi menen xalqımızdıń mádeniyatı hám ádebiyatın rawajlandırıwda, sonday-aq, jas áwladtı Watansúyiwshilik ruwxında tárbiyalawda áhmiyetli esaplanadı. Sonlıqtan shayırdıń dóretiwshilik jumısların tereńnen úyreniw, onıń ádebiy shıǵarmalarınıń áhmiyetin jaslar arasında úgit-násiyatlaw baslı wazıypalardan sanaladı.
Saltanatlı bayram keshesi qatnasıwshılarına filialdıń professor-oqıtıwshıları hám student-jasları tárepinen tayarlanǵan koncert baǵdarlaması menen dawam etti.
