Ata-babalarımız mudamı keleshek áwladqa óziniń turmıstan tuygenlerin, bilgenlerin bilim hám ónerlerin uyretip, miyras etip qaldırıp otırǵan. Bul haqqında awızeki ádebiyatımızda kóplegen shıǵarmalar, hikmetli sózler dóretip balaların tárbiyalap jaqsılıqqa jeteklep kelgen. Házirgi kúnde de usı islerdi rawajlandırıp jaslarımızdı kámil insan etip tárbiyalawda ómiri, jámiyetlik  iskerligi kópshilikke ulgi bolǵan ziyalı insanlar menen ushırasıw, olardan órnek alıw baslı wazıypalardan sanaladı.

Ózbekstan mámleketlik kórkem óner hám mádeniyat institutı Nókis filialı “Social-gumanitar pánler” kafedrası tárepinen «Úsh áwlad ushırasıw» atamasında keshe shólkemlestirildi.

Ushırasıwǵa Berdaq atındaǵı Mámleketlik muzey direktorı, shayır, jurnalist, jazıwshı Shárigul Payzullaeva, usı muzeydiń bólim baslıǵı Minavvar Abbazova hám NMPIdiń «Social-gumanitar pánlerdi aralıqtan oqıtıw» kafedrası aǵa oqıtıwshısı,  jas ilimpaz Miyrixan Qayipnazarova,  Filialı «Social gumanitar pánler» kafedrası professor-oqıtıwshıları, student jaslar qatnastı.

Ilajda Sh.Payzullaeva Berdaq atındaǵı muzeyi, xalqımızdıń tariyxı,  muzey eksponatları, saqlanǵan qol jazbaları haqqında qızıqlı maǵlıwmatlardı aytıp ótti. Bunnan soń, jas ilimpaz Miyrixan Qayıpnazarova óziniń izertlew jumısı, ilimiy jumıs, ilimiy maqalalar jazıw haqqında student-jaslarǵa óziniń bahalı pikirlerin bildirdi.

Ilaj dawamında student jaslar muzeydiń fondınan alıp kelingen eksponatlar menen tanıstı. Bul ushırasıw jaslardıń kewillerindegi umitlerdi oyatıp, jámiyetlik isker, pidayı insan, ilimpaz bolıwǵa sharlaydı, motivaciya boladı degen niyettemiz.