Búgin Ózbekstan mámleketlik kórkem óner hám mádeniyat institutı Nókis filialı menen «Dawıtbay Qayıpov jámiyetlik fondı» hám «Máńgi miyras» Ózbekstan mádeniyatı hám kórkem óneri úgit-násiyatı Orayı Qaraqalpaqstan Respublikası bólimi arasında birge islesiw memorandumına qol qoyıldı.

Usı múnásibet penen bolıp ótken ilajda Filial direktorı K.Yusupov hám B.Qayıpov jáne tiyisli basshı-qánigeler qatnastı.

Filial direktorı atap ótkenindey, Qaraqalpaqstan xalıq artisti, búlbilziban – D.Qayıpovtıń dóretiwshiligi, sonıń ishinde, milliy qosıq atqarıwshılıqtaǵı máńgi miyrası búgingi kúnde de xalqımızǵa joqarı ruwxıy suwsın baǵıshlap, jas atqarıwshılarǵa tájiriybe hám sheberlik mektebin ótep kelmekte. Usı baǵdarda Búlbilziban atındaǵı jámiyetlik fond penen birge islesiw, Filial ushın, jas atqarıwshılardı qollap-qwatlawda oǵada áxmiyetli bolıp tabıladı.

Maǵlıwmat ornında: bul birge islesiw memorandumınıń tiykarǵı maqseti – aldaǵı 5 jıl dawamında Respublikamız aymaǵında kórkem óner ham mádeniyattı keńnen úgit-násiyatlaw, materiallıq emes mádeniy miyras úlgileri, folklor, milliy muzıka hám onıń ráń-báreń túrleri menen janrların úyreniw, saqlaw hám keleshek áwladlarǵa jetkeriw boyınsha perspektivalı joybarlardı turmısqa engiziwden ibarat.

Filial baspasóz xızmeti