«Өзбекстан Республикасының мәмлекетлик гимни ҳаққында»ғы Нызам 1992-жыл 10-декабрьде Өзбекстан Республикасы Олий Кенгашининг он биринши сессиясында қабыл етилди.Быйыл Өзбекстан Республикасы мәмлекетлик гимниниң қабыл етилгенине 30 жыл толды. Байрам илажлары елимиздиң барлық орынларында көтериңки руўхта белгиленбекте.

Сәне мүнәсибети менен Өзбекстан мәмлекетлик көркем өнер ҳәм мәденият институты Нөкис филиалында «Шухратинг порласин токи бор жаҳон» сүрени астында байрам илажы болып өтти.

Дәслеп, Өзбекстан ҳәм Қарақалпақстан Республикаларының мәмлекетлик гимнлери жаңлады.

Буннан соң филиал директоры А.Аяпов, Көркем өнертаныў факультети деканы Г.Ходжаметова ҳәм «Халық дөретиўшилиги» кафедрасы профессоры С.Балтаниязовлар шығып сөйлеп, мәмлекетимиз нышанлары, соның ишинде, гимнниң әҳмийетине айрықша тоқтап өтти.

Ҳәр бир мәмлекеттиң байрағы, герби, гимни — сол мәмлекет суверинитетиниң тымсалы болып есапланады. Усы мәмлекетлик нышанлар арқалы биз өзлигимизди мақтаныш етемиз, ертеңги күнге болған исенимимизди беккемлеймиз. Халқымыз өтмишин, миллий-мәдений дәстүрлерин, қәдириятларын, тынышлық ҳәм миллетлераралық татыўлық сыяқлы пазыйлетлерди өзинде жәмлеген гимн өзлигимизди мақтаныш етиўде, жасларды Ўатансүйиўшилик руўхында тәрбиялаўда, сондай-ақ, олардың ҳәр тәреплеме жетик инсанлар болып жетилисиўинде тәрбиялық әҳмийетке ийе қурал сыпатында хызмет етип келмекте. Сондай-ақ, мәмлекетлик гимн елимиз делегацияларының сырт еллерге сапары ўақтында, халықаралық майданлардағы түрли илажларда, спорт жарысларында елимиздиң тымсалы  сыпатында жаңлап келмекте.

Мағлыўмат орнында айтып өтетуғын болсақ, мәмлекетлик гимнниң сөзи Өзбекстан халық шайыры А.Арипов қәлемине тийисли болып, намасы Мутал Бурханов тәрепинен жазылған.

Филиал баспасөз хызмети.